Zëvendëskryetari i Komunës së Tetovës, Albi Qamili, ka njoftuar se procesi i riemërtimit të rrugëve në Tetovë po vazhdon, duke theksuar se synohet një zgjidhje e qëndrueshme, ligjore dhe gjithëpërfshirëse.
Përmes një postimi në rrjetet sociale, Qamili bëri të ditur se Grupi i Punës për riemërtimin e rrugëve ka shqyrtuar një grup tjetër emrash, të cilët, sipas tij, pasqyrojnë historinë, identitetin dhe realitetin e Tetovës dhe bashkësive që jetojnë në të.
Ai theksoi se palët janë dakorduar që procesi të ketë prioritet ligjshmërinë dhe qëndrueshmërinë, pa u përfshirë në lojëra politike dhe manovra juridike.
Si kryesues i Grupit të Punës, Qamili u shpreh se do të angazhohet që procesi të përmbyllet me zgjidhje të qëndrueshme dhe gjithëpërfshirëse, duke mos lejuar që ai të diktohet nga presioni kohor apo politika ditore.







