Këshilltari komunal i VLEN-it në Komunën e Likovës ka kërkuar zgjerimin e transportit të organizuar për nxënësit, duke theksuar se shërbimi duhet të përfshijë jo vetëm nxënësit e shkollës së mesme, por edhe nxënësit e shkollave fillore nga të gjitha vendbanimet e komunës, raporton OPEN-TV.
Çështja e transportit të nxënësve u diskutua në seancën e Këshillit të Komunës së Likovës, ku u shqyrtua edhe ndryshimi i çmimit të transportit për nxënësit që ndjekin mësimin në shkollën e mesme “Ismet Jashari” në Likovë. Sipas këshilltarit, në kuadër të këtij transporti janë përfshirë nxënësit nga fshatrat malore dhe ato të rrafshit të Likovës, përfshirë edhe vendbanimet nga të cilat numri i nxënësve është relativisht i vogël.
Këshilltari ka kërkuar që transporti të zgjerohet edhe për nxënësit e fshatrave të tjera, duke argumentuar se zhvillimi i vendbanimeve dhe zgjerimi i lagjeve të banimit kanë bërë që distancat deri te shkollat të jenë të konsiderueshme për një pjesë të nxënësve.
Si shembull, ai ka përmendur pjesë të fshatit Sllupçan, ku janë ndërtuar lagje të reja banimi dhe ku nxënësit, sipas tij, duhet të përshkojnë distanca të gjata në këmbë deri te SHFK “Faik Konica”, e cila ndodhet ndërmjet Sllupçanit dhe Orizarës. Probleme të ngjashme, sipas tij, paraqiten edhe në pjesë të tjera të Orizarës dhe Vaksincës, ku nxënësit duhet të udhëtojnë në këmbë deri te shkollat përkatëse.
“Me një fjalë, duhet të sigurohet transporti edhe për fshatrat e tjera të Komunës së Likovës, në mënyrë që të lehtësohen edhe prindërit, por sidomos nxënësit që çdo ditë shkojnë në shkollë”, është thelbi i kërkesës së këshilltarit.
Ai ka bërë të ditur se për këtë çështje do të kërkojë bashkëpunim me drejtuesit e Komunës së Likovës dhe Ministrinë e Arsimit dhe Shkencës, me synim që të gjendet një zgjidhje për zgjerimin e transportit të nxënësve.
Sipas tij, sigurimi i transportit nuk duhet të shihet vetëm si një shërbim shtesë, por si një mënyrë për t’u garantuar nxënësve qasje më të lehtë dhe më të barabartë në arsim, veçanërisht për ata që jetojnë në pjesët më të largëta të vendbanimeve.
Këshilltari ka apeluar që kërkesa të trajtohet institucionalisht, duke theksuar se qëllimi është lehtësimi i përditshmërisë së nxënësve dhe prindërve dhe krijimi i kushteve më të mira për ndjekjen e mësimit.







