Tenori i njohur nga Maqedonia e Veriut, Ismet Vejseli, po qëndron në Barcelonë të Spanjës, ku po zhvillon përgatitjet artistike për koncertet dhe shfaqjet e ardhshme, nën udhëheqjen e vokal pedagogut të tij, Maestros Raúl Giménez. Përmes një postimi në Facebook, Vejseli ka bërë të ditur se ky është viti i tretë radhazi që bashkëpunon me Maestron, të cilin e ka falënderuar për këshillat, udhëzimet dhe përkushtimin e vazhdueshëm gjatë procesit të tij artistik, raporton OPEN-TV.
Tenori thekson se formimi profesional në muzikë është një proces i pandërprerë dhe se puna me një artist të kalibrit të Raúl Giménez përbën një mundësi të veçantë për avancim, rritje artistike dhe thellim të njohurive e përvojës vokale. Në këtë kontekst, Vejseli e vlerëson bashkëpunimin si një pjesë të rëndësishme të rrugëtimit të tij profesional, duke shprehur mirënjohje për çdo hap të këtij procesi.
Në përfundim të mesazhit, Vejseli ka falënderuar edhe Academia Barcelona Concertante, për mundësinë dhe mbështetjen në këtë angazhim artistik në Barcelonë./OPENTV







