Ministri i Drejtësisë, Jeton Shasivari, po merr pjesë në Konferencën e Dytë Globale Ministrore për Eliminimin e Dhunës ndaj Fëmijëve, që po mbahet në Manila të Filipineve, ku janë mbledhur përfaqësues nga 131 shtete të botës.
Në këtë forum të rëndësishëm ndërkombëtar, të organizuar nga Qeveria e Filipineve në partneritet me Organizatën Botërore të Shëndetësisë (OBSH) dhe UNICEF-in, diskutohen politikat dhe mekanizmat për parandalimin dhe eliminimin e të gjitha formave të dhunës ndaj fëmijëve.
Pjesëmarrja e ministrit Shasivari është përfshirë edhe në programin zyrtar të konferencës. Më 19 nëntor, ai do të marrë pjesë në sesionin ndërkombëtar: “Connecting Regions, Advancing Solutions: A Cross-Regional Exchange”, së bashku me ministra dhe përfaqësues të lartë nga vende të ndryshme, ku do të diskutohet për zgjidhje konkrete dhe bashkëpunim ndërrajonal në luftën kundër dhunës ndaj fëmijëve.
Shasivari thekson se mbrojtja e fëmijëve duhet të jetë prioritet i pakompromis i çdo institucioni, duke nënvizuar se drejtësia nuk matet vetëm me reagimin ndaj shkeljeve, por edhe me aftësinë e institucioneve për t’i parandaluar ato dhe për të mbrojtur kategoritë më të cenueshme.
Në fokus të konferencës janë forcimi i mekanizmave të mbrojtjes së fëmijëve, siguria në shkolla, mbështetja e familjeve, mbrojtja nga dhuna në hapësirën digjitale dhe thellimi i bashkëpunimit ndërinstitucional e ndërkombëtar.
“Çdo fëmijë ka të drejtë të rritet i sigurt. Dhe kjo e drejtë nuk njeh kufij”, është mesazhi i ministrit Shasivari në kuadër të pjesëmarrjes në këtë konferencë globale.(INA)







