Një përplasje publike mes përfaqësuesve të BDI-së dhe VLEN-it në Kumanovë është zhvilluar pas pretendimeve të Amir Shabanit nga BDI se Ibrahim Zenuni, ish-pjesëtar i UÇPMB-së dhe UÇK-së, është ndëshkuar në vendin e punës për shkak të kritikave të tij ndaj politikave të qeverisë në rrjetet sociale, shkruan OPEN-TV.
Shabani ka akuzuar drejtorin e përgjithshëm të Postave të Maqedonisë së Veriut, Orhan Kurtishin, kuadër i VLEN-it nga Kumanova, se ka ndërmarrë masa ndaj Zenunit duke e detyruar të udhëtojë çdo ditë nga Kumanova në fshatin Ropalçë. Sipas Shabanit, ky veprim përbën ndëshkim për qëndrimet kritike të Zenunit në Facebook ndaj politikave të qeverisë, të cilat ai i cilëson si antishqiptare.
Përmes reagimit të tij, përfaqësuesi i BDI-së e ka paraqitur rastin si cenim të lirisë së shprehjes dhe si presion ndaj një ish-pjesëtari të luftërave të UÇPMB-së dhe UÇK-së. Ai ka shprehur solidaritet me Zenunin, duke pretenduar se pasojat e këtij veprimi rëndojnë edhe mbi familjen e tij.
Nga ana tjetër, drejtori i përgjithshëm i Postave, Orhan Kurtishi, i ka mohuar kategorikisht akuzat, duke i cilësuar ato si pretendime të pavërteta që synojnë të njollosin punën dhe personalitetin e tij. Kurtishi ka deklaruar se nuk e ka ndëshkuar Zenunin dhe as nuk ka dhënë ndonjë urdhër për një veprim të tillë, duke theksuar se kjo vlen pavarësisht nëse bëhet fjalë për ish-pjesëtarë të luftës apo për persona të tjerë.
Kurtishi i është drejtuar publikisht Amir Shabanit me kërkesën që të tërheqë deklaratat dhe të korrigjojë pretendimet, në të kundërtën paralajmëroi se do të kërkojë mbrojtjen e të drejtave të tij përmes rrugëve ligjore dhe do ta ndjekë çështjen në gjykatë për shpifje. Ai ka kërkuar që përplasjet politike të zhvillohen mbi fakte dhe argumente, e jo përmes deklaratave që, sipas tij, dëmtojnë emrin dhe reputacionin e të tjerëve./OPENTV






