Brajan Gruda e ka refuzuar mundësinë e të qenurit pjesë e kombëtares së Shqipërisë, pavarësisht interesimit dhe përpjekjeve të vazhdueshme të Federatës Shqiptare të Futbollit (FSHF) për ta bindur që të vishte fanellën kuqezi.
Për këtë çështje ka folur presidenti i FSHF-së, Armand Duka, në një intervistë për “Top Channel”, ku ka treguar se Federata ka bërë përpjekje në vazhdimësi për ta afruar sulmuesin me origjinë shqiptare.
Duka ka shprehur dëshirën e madhe që Gruda të ishte pjesë e Shqipërisë, duke vlerësuar njëkohësisht cilësitë e tij si futbollist.
Megjithatë, sipas presidentit të FSHF-së, vendimi i lojtarit ka qenë që të përfaqësojë Gjermaninë, me të cilën tashmë ka luajtur edhe në grupmoshat e reja, përfshirë U21.
“Padyshim që duke qenë shqiptar me prindër shqiptarë, pavarësisht se i lindur në Gjermani, kemi pasur shumë dëshirë ta kemi në skuadër, kemi provëzuar, por zgjedhja e tij ka qenë, ka qenë Gjermania dhe tashmë ky është një kapitull i mbyllur. Ai është paraqitur me Gjermaninë dhe s’mbetet gjë tjetër veçse t’i urojmë suksese në karrierën e tij sportive”, u shpreh Duka.
Kreu i futbollit shqiptar ka bërë të ditur se tentativat për ta bindur Grudën nuk kanë nisur vetëm pas shpërthimit të tij në futboll, por kanë qenë të vazhdueshme gjatë një periudhe më të gjatë.
I pyetur nëse FSHF-ja kishte pasur kontakte me futbollistin edhe më herët, Duka dha këtë përgjigje: “Po, po, në çdo kohë i kemi ofruar, po vendimi i tij ka qenë që të përfaqësojë Gjermaninë”.
Kësisoj, Shqipëria nuk ka arritur ta bindë Brajan Grudën, i cili ka vendosur të vazhdojë karrierën ndërkombëtare me Gjermaninë.
Për FSHF-në, siç e bëri të qartë edhe vetë Duka, kjo çështje tashmë është një kapitull i mbyllur.
Brajan Gruda shkëlqeu në dy ndeshjet e nëntorit me Gjermaninë, duke arritur të shënojë dy gola e dy asistime, në ndeshjet ndaj Serbisë dhe Holandës.
Gruda po tregon paraqitje të mira edhe me Leipzigun, për të cilin ka shënuar tri gola e ka dhuruar pesë asistime, në të gjitha garat.
22-vjeçari është i huazuar momentalisht te Leipzigu, pasi është nën pronësi të Brightonit në Angli.
Mirëpo, sipas raportimeve të fundit, është bërë e ditur se klubi gjerman e ka aktivizuar mundësinë e blerjes që e kishte në kontratë, për 30 milionë euro, me Grudën që pritet të nënshkruajë kontratë deri më 2031 me Leipzigun./GazetaExpress/






