Një lajm i mrekullueshëm ka ardhur nga Komiteti Olimpik i Kosovës (KOK). Këta të fundit kanë konfirmuar se skitarja kampione, Sophie Sorschag, ka vendosur që ta përfaqësojë Kosovën.
Kosova do ta ketë një kampione në radhët e veta në ski. Komiteti Olimpik i Kosovës ka njoftuar se është arritur marrëveshja me Sophie Sorschag që ta përfaqësojë vendin tonë nga tani e ttuje.
Kjo ujdi mësohet se është arritur në Slloveni mes drejtuesve të Federatës të Skitarisë së Kosovës dhe ekipit të Sorchag. Marrëveshje që është arritur në kryeqendrën sllovene, respektivisht në Lubjanë.
Ajo ka qenë edhe kampione e botës me Austrinë në garën ekipore që u zhvillua më 2021. Po ashtu ajo ka qenë pjesë edhe e garave në Lojërat Olimpike Dimërore, Pekin 2022.
Lajmi në fjalë u konfirmua edhe nga Federata e Skitarisë së Kosovës. Në njoftimin e vet ajo saktësoi se në çfarë disipline do të garojë me kosovarën 24-vjeçarja.
“Federata Skitare e Kosovës në krye me Kryetarin z. Milaim Kelmendi arritën marrëveshje me skitaren e disiplinës nordike( kërcim me ski) Sophie Sorschag që të përfaqësojë Kosovën në ngjarjet më të rëndësishme të skijimit nordik me flamurin e shtetit të Kosovës”, thuhet në komunikatën e tyre.
Ky është njoftimi zyrtar nga Komiteti Olimpik i Kosovës:
Kampionia e botës , Sophie Sorschag, do të “fluturojë” për Kosovën
Një lajm i bujshëm ka ardhur nga Federata Skitare e Kosovës (FSK).
FSK ka arritur marrëveshje me skitaren e kërcimeve me ski, Sophie Sorschag, e cila Tani e tutje do ta përfaqësojë Kosovën në garat ndërkombëtare.
24-vjeçarja është kampione bote me Austrinë në ekipore për vitin 2021, ndërsa vitin e kaluar mori pjesë në Lojërat Olimpike Dimërore Pekin 2022.
Marrëveshja mes drejtuesve të FSK-së, kryetarit Milaim Kelmendi e nënkryetarit Bujar Turjaka dhe ekipit të Sorschag, u arrit sot në Ljubljanë të Sllovenisë.
I urojmë shumë fat e suksese Sorschagut në fanellën e Kosovës.