Studentët e Fakultetit Filozofik – departamenti i Historisë pranë Universitetit të Tetovës më date 18 dhe 19 maj 2023 ishin pjesmarrës në Konferencën Shkencore Studentore Ndërkombëtare ,,Kërkimi shkencor dhe edukimi në perspektivën e studentëve dhe studiuesve të rinj – UT flet me zërin e studentëve” e cila i bashkoi të gjithë studentët nga trojet shqipfolëse dhe jo vetëm. Fjalë rasti për të pranishmit mbajtën Ministria e Arsimit, Sportit dhe Rinisë së Shqipërisë znj.Evis Kushi. Studentët e Universitetit të Tetovës u paraqitën me dy kumtesa në grup autorësh. Punimi i parë ishte ”Roli dhe rëndësia e Universitetit të Tetovës për shqiptarët e Maqedonisë (1994-2004)” nga Kudret Ferizi dhe Erland Shaini.
Aty trajtohej zanafilla e themelimit të Universitetit të Tetovës, protestat dhe demonstratat, ligjëratat e para dhe puna e Universitetit të Tetovës deri në zyrtarizimin e tij. Në këtë kumtesë mes tjerash u tha: “Idealistët e themelimit të Universitetit nuk hoqën dorë nga legalizimi, më në fund edhe e arritën atë. Ishte inicuar debat parlamentar për zyrtarizimin e Universitetit të Tetovës. Më datë 21 janar 2004 në seancën e 51-të të Kuvendit të RM-së, me 68 vota ,,për,, u miratua Ligji për themelimin e Universitetit të Tetovës. Universiteti i Tetovës paraqet fortesë për mbrojtjen e identitetit, kulturës dhe gjuhës shqipe.
Roli i tij, përveç se të krijojë kuadro të rinjë shqiptarë, është që edhe ta mbajë gjallë frymën shqiptare në trojet lindore etnike shqiptare.” Punimi i dytë ishte “Shpërngulja e shqiptarëve të Maqedonisë së Veriut në intervalin kohor 1953-1955” nga Ariton Salihu, Suada Bajrami dhe Hixhret Abdili. Kryesisht trajtuan shpërnguljen e shqiptarëve në Turqi në vitet 1953-1955 dhe shkaqet që i paraprinë kësaj shpërngulje dhe shpërnguljeve tjera të mëparshme në kohëra të ndryshme.
Në këtë kumtesë u tha: “Marrëveshja ndërmjet Jugosllavisë dhe Turqisë mbi shpërnguljen e popullit shqiptar, turk dhe boshnjak u nënshkrua në vitin 1953. Pala jugosllave gjatë vitit 1951 në bisedimet e para paraprake jugosllavo-turke, me këmbëngulje do të insistojë që të implementohet marrëveshja ndërshtetërore e vitit 1938, e cila nuk u ratifikua nga pala turke, edhe pse qysh atëherë qeveria mbretërore jugosllave insistonte që marrëveshja të ratifikohet. Por, menjëherë në bisedimet e para bilaterale jugosllavo-turke, qeveria turke do të nxitet që të ratifikohet marrëveshja e vitit 1938. Në Split në vitin 1953 do të nënshkruhet marrëveshja mbi shpërnguljen e shqiptarëve, turqve dhe boshnjakëve. Këtë akt të turpshëm gjenocidal do ta nënshkruajnë kryetari i Jugosllavisë Josip Broz Tito dhe ministri i punëve të Jashtme i Turqisë Fuad Kyprili.”
Kjo ngjarje shërben si një urë lidhëse mes studentëve të të dy Universiteteve, të Tetovës dhe atij të Tiranës. Studentët kaluan shkëlqyeshëm në këtë Konferencë dhe falëmnderojnë Universitetin e Tiranës për nderin dhe kujdesin e treguar.
