RESHAT IBRAIMI/OPEN-TV
Për 40 vite në mision të shenjtë të edukimit të brezave. Për katër dekada punë, gjithmonë të dashur, të pranuar dhe të respektuar në shkollën ku kanë punuar. Mirënjohje pa fund për dy bashkëshortët, mësues të palodhur të dijes, shkruan Open-TV.
Bëhet fjalë për Nexhmedin Iseni dhe Rita Rushiti Iseni, të dy ish mësues të shkollës fillore komunale “Naim Frashëri” nga Kumanova.
Mësuesi Nexhmedin ka punuar 43 vite mësues, kurse zonja Rita 40 vite. Të dy tani janë në pension.
Ata ishin njohur para 50 vitesh në shkollë të mesme të gjimnazit dhe prej atëherë kanë qenë të pandarë.
Gjatë punës së tyre shumëvjecare janë dekoruar me shumë mirënjohje, çmime si mësues të dalluar, diploma për kontributin e tyre në SHKA Bajram Shabani. Mësues Nexhë siç e njohim të gjithë përveç si mësues ka qenë edhe ndihmësdrejtor i shkollë dhe ish-kryetar i Shoqatës së Sindikatëve.
Mësuesi Nexhmedin, së bashku me Etem Xheladinin, dhe shumë të tjerë kanë hedhur librezat komuniste në kohën e Ish-jugosllavisë. Gjithashtu edhe si shumë të tjerë ka qenë i akuzuar per organizimin e protestave për cështjen kombëtare në vitet e 80-ta dhe disa herë edhe i burgosur për rrënimin e sistemit monist nëpër shkolla.
Me Ismail Xheladinin kanë qenë themelues të Shoqatës Nënë Tereza, duke dhënë një kontribut të madh në ndihmat humanitare gjatë konfliktit të vitit 2001 në rajonin e Likovës, kuptohet gjithmonë duke pasur mbështetjen maksimale të bashkëshortes së tij Rita.
Djali i këtij cifti të përkryer, prof. dr. Astrit Iseni, pa modesti tha se prindërit e tij janë një Romeo dhe Xhulieta shqiptare-janë një çift i rrallë.
Së fundmi, edhe Shoqata “Java kulturore shqiptare” nga Kumanova me rastin e 22 nëntorit-Ditës së Alfabetit shqip e nderoi zonjën Rita me mirënjohje për kontribut në mbarëvajtjen e këtij manifestimi./Open-TV/
