Në kuadër të vizitës së sotme zyrtare të delegacionit të lartë qeveritar nga Republika e Bullgarisë, në krye me Kryeministrin, Kiril Petkov, ministri i Punëve të Jashtme, Bujar Osmani realizoi takim të ndarë me minstren e Punëve të Jashtme, Teodora Gençovska.
Nga Ministria për Punë të Jashtme njoftojnë se në takim u përshëndet ripërtëritja e dialogut mes dy Qeverive, si dhe rëndësia e vazhdimit të komunikimit intensiv në nivel të lartë me çka u shpreh besimi se me dinamikën e re në komunikim do të arrihet përmirësimi i nevojshëm i marrëdhënieve bilaterale.
Fokus i bisedimeve ishte seanca vijuese e përbashkët e Qeverive, e cila do të mbahet në Sofje më 25 janar, si dhe futja e dinamikës së re në bashkëpunim përmes zbatimit të konceptit të grupeve të punës, me çka u shqyrtuan fushat konkrete në të cilat ka potencial për avancim. Me këtë, të dy vendet do të dërgojnë sinjal të qartë se ekziston vullnet i fuqishëm për hapërim dhe mirëkuptim të ndërsjellë, në frymën e fqinjësisë së mirë dhe vlerave evropiane.
“Vizita ndodh në 30-vjetorin e njohjes së parë të pavarësisë së vendit tonë, e cila erdhi pikërisht nga Republika e Bullgarisë, por kjo është edhe vizita e parë e Kryeministrit, Petkov në rajonin e Ballkanit Perëndimor në përgjithësi, e cila dërgon një mesazh shumë të rëndësishëm dhe të vlefshëm për marrëdhëniet tonat, por jo më pak i rëndësishëm për dinamikën tonë dhe besoj se është një qasje ndryshe në tejkalimin e sfidave me të cilat përballemi”, tha ministri Osmani
Bashkëbiseduesit konfirmuan se integrimi evropian i Ballkanit Perëndimor paraqet interes nacional si të vendeve kandidate për anëtarësim ashtu edhe të vendeve anëtare të Bashkimit Evropian. E shprehën përkushtimin ndaj procesit të afrimit të rajonit me Bashkimin Evropian dhe e theksuan rëndësinë e fqinjësisë së mirë dhe bashkëpunimit rajonal, si investim në të ardhmen e përbashkët evropiane.
Lidhur me bashkëpunimin ekonomik, Ministrat e përshëndetën rritjen e shkëmbimit tregtar mes dy vendeve nga 30% gjatë vitit 2021 dhe i shprehën pritshmëritë e tyre që gjatë vitit 2022 do të ruhet ritmi pozitiv i rritjes së të dyja ekonomive dhe shkëmbimit tregtar mes tyre, si dhe trendi pozitiv i investimeve të reja, të cilat duhet të mbështeten nga të dyja shtetet.