Trajneri i përfaqësueses së Maqedonisë, Goce Sedloski, ka dalë para mediave në prag të përballjes me Skocinë në kuadër të Ligës së Kombeve të UEFA-s.
Pas dy humbjeve në dy ndeshjet e para ndaj Zvicrës dhe Sllovenisë, përfaqësuesja e Maqedonisë përballet me një tjetër sfidë të rëndësishme në Ligën B. Ndeshja ndaj Skocisë pritet të jetë veçanërisht e rëndësishme për vazhdimësinë e ekipit në këtë nivel të garës.
Sedloski u bëri thirrje tifozëve që të mbështesin lojtarët dhe theksoi se kritikat duhet të drejtohen ndaj tij.
“Humbjet në dy ndeshjet e para nuk na përshtaten. Bardi do të mbetet kapiten i ekipit edhe në të ardhmen. Kjo është hera e parë që dëgjoj për një informacion të tillë. Ju lutem, jepuni të gjithëve mbështetjen tuaj. Ne e kemi rigjallëruar ekipin kombëtar dhe unë do të vazhdoj ta bëj këtë. Lërini kritikat të shkojnë tek unë, ndërsa unë do të vazhdoj ta rigjallëroj ekipin në bashkëpunim me federatën”, deklaroi Sedloski.
Ai shtoi se një nga objektivat kryesore është krijimi i një ekipi me lojtarë të rinj dhe se ky proces kërkon kohë.
“Duam të krijojmë lojtarë të rinj. E thashë këtë edhe pas ndeshjes në Lubjanë dhe do t’i përmbahem këtij procesi deri në fund. Kur erdha, e dija se me çfarë përfaqësuesesh do të përballeshim. Në Ligën C luftonim më shumë në sulm dhe shënonim gola. Unë punoj, shikoj, ndjek dhe e di se çfarë po bëj. Do të qëndroj këtu dhe do të bëj gjithçka që këta djem të jenë të kënaqur dhe ta bëjnë Maqedoninë të lumtur. Kjo kërkon kohë, nuk mund të bësh gjithçka brenda natës”, tha trajneri.
Në lidhje me kundërshtarin e radhës, Sedloski paralajmëroi një ndeshje të vështirë dhe theksoi se Maqedonia duhet të imponojë mënyrën e saj të lojës.
“Skocia është një ekip që luan me topa të gjatë drejt zonës së penalltisë. Nuk duhet ta pranojmë lojën e tyre, por ta neutralizojmë me reagimin tonë. Nëse e pranojmë stilin e tyre të lojës, do të ishte fatale. Ata kanë lojtarë nga Premier League, Championship dhe Italia”, u shpreh Sedloski.
Trajneri i Maqedonisë pret që skuadra e tij të tregojë karakter dhe të vazhdojë me qasjen e shfaqur në Slloveni, pavarësisht rezultatit.
“Jemi gati të dalim në fushë, të tregojmë karakter dhe të luajmë ashtu siç luajtëm në Slloveni. Me paraqitjen atje mund të jem i kënaqur, përveç rezultatit. Duhet të vazhdojmë me atë ritëm dhe jo të mbrohemi”, përfundoi Sedloski.
Ndeshja Maqedoni – Skoci do të zhvillohet të shtunën në orën 20:45 në Arenën “Todor Proeski” në Shkup. Drejtësinë do ta ndajë gjyqtari francez François Letexier.







