Më 19 nëntor 2026, Reisul Ulema i Bashkësisë Fetare Islame të Republikës së Maqedonisë së Veriut, H. Hfz. Shaqir ef. Fetai, priti në takim prof. Berat ef. Ramadanin, nënkryetarin e Kuvendit të Bashkësisë Fetare Islame të RMV-së.
Gjatë këtij takimi u diskutua për çështje të rëndësishme që ndërlidhen me Islamin, vlerat e tij universale dhe rolin e institucionit fetar në ruajtjen, kultivimin dhe afirmimin e këtyre vlerave në shoqërinë bashkëkohore.
Një pjesë e bisedës iu kushtua edhe zhvillimeve aktuale në vend dhe në arenën ndërkombëtare, me ç’rast bashkëbiseduesit shkëmbyen mendime lidhur me sfidat, përgjegjësitë dhe rolin që kanë institucionet fetare islame në përballjen me zhvillimet e kohës.
Vëmendje e veçantë iu kushtua pjesëmarrjes së Reisul Ulemasë në konferenca, takime dhe tubime të ndryshme ndërkombëtare, të cilat përbëjnë mundësi të rëndësishme për dialog ndërfetar, bashkëpunim institucional, përfaqësim dinjitoz dhe afirmim të vlerave islame në nivel ndërkombëtar.
Po ashtu, u diskutua për projektet dhe aktivitetet e Bashkësisë Fetare Islame në periudhën e ardhshme, me synimin e avancimit të veprimtarisë institucionale, forcimit të pozitës dhe rolit të saj në shoqëri, si dhe përmbushjes sa më të suksesshme të misionit të saj fetar, edukativ dhe shoqëror.
Takimi u zhvillua në një atmosferë të përzemërt, konstruktive dhe vëllazërore, duke dëshmuar frymën e mirëkuptimit, bashkëpunimit dhe përkushtimit të përbashkët ndaj misionit dhe vlerave të Bashkësisë Fetare Islame.
Open-TV






