24 janar 2022 – Boksierët e kombëtares së Kosovës prej ditës së shtunë kanë nisur përgatitjet në Durrës të Shqipërisë. Seleksionuesi i ekipit të seniorëve, Besim Brahimi në një prononcim të tij për Open-TV deklaroi se stërvitjet po rrjedhun në mënyrën e duhur.
“Kemi ardhur të shtunën dhe do të qëndrojmë deri ditën e dielëne ardhshme, do të thotë nëntë ditë. Në Durrës jemi me trajnerët Lirim Shllagu, Mehmet Hagjani, seleksionuesin e juniorëve Besnik Vranovci si dhe 37 boksierë të të trija grupmoshave, pra kadet, junior dhe senior. Me ne është edhe përgjegjësi i ekipit, sekretari gjenerat i Federatës, z. Latif Demolli. Po stërvitemi nga tre herë në ditë. Kushtet i kemi shumë të mira”, deklaroi seleksionuesi i seniorëve Besim Brahimi për Open-TV.
Ai tregoi për aktivitetet e shumta që i presin gjatë këtij viti.
“Na presin aktivitete të shumta, duke nisur nga turneu Pavarësia, që do të mbahet me 14 shkurt në Prishtinë. Pastaj turnet Stranxhak në Sofje dhe Emil Jechev, të dyja në Bullgari, turneu Mimoza në Mal të Zi dhe kampionati evropian U22 në Zagreb të Kroacisë”, bëri me dije trajneri Brahimi.
Boksierët e Kosovës do të qëndrojnë në Durrës deri të dielën që vjen. /Open-TV/
