Komunat e RMV-së përfshirë komunën e Kumanovës nuk ishin të përgatitura për t’u përballur me pandeminë prandaj edhe menaxhimi nuk ishte në nivelin e duhur, kështu deklaroi kryetari i Komunës së Kumanovës Maksim Dimitrievski në panel diskutimin e sotëm të organizuar nga Organizata Joqeveritare “Pulse of Democracy” me temë menaxhimi dhe sfidat e vetëqeverisjes lokale gjatë pandemisë.
“Ne si komunë nuk kishim resurse të mjaftueshme, kuadër të aftë të mjaftueshëm që të menaxhojmë me gjithë atë krizë, dhe më duhet të theksoj se nuk kishte nivel të mjaftueshëm të bashkëpunimit mes organeve kompetente shtetërore dhe organeve të vetëqeverisjes lokale”, tha Dimitrievski.
Sipas Dimitrievskit, i gjithë keqmenaxhimi i qeverisë i kushtoi shtrenjtë komunave të cilat ishin të kequdhëzuara dhe si pasojë u harxhuan mjete financiare nga buxheti i komunave për gjëra të panevojshme.
“Bëhej dezinfektim masiv, që më vonë ne të marrim mendim nga po i njëjti komision, se gjithë atë që e kemi punuar nuk është dashur ta bëjmë. U harxhuan mjete të stërmëdha dhe efekt në realitet nuk kishim”, shton Dimitrievski.
Përvoja institucionale ka munguar edhe në Kosovë sipas kryetarit të Komunës së Gjilanit, e sidomos në sektorin e shëndetësisë.
“Kosova është përballur më një numër relativisht të madh të rasteve dhe në fakt ky problem është problem shumë i madh pasi sikur se edhe në vendet tjera e edhe në Maqedoninë e Veriut ka qenë çështja e nivelit jo fort të mirë, jo të kënaqshëm të shëndetësisë. Me ç’rast kapacitetet tona spitalore kanë qenë të kufizuara”, tha Hyseni.
Veç kapaciteteve teknike të kufizuara, sfidë sipas kryetarit të Gjilanit Alban Hyseni kanë qenë edhe kapacitetet e kufizuara të kuadrove të specializuara për çështje të tilla e që pasojat i janë faturuar komunave.