Shefi i Ferrari, Frederik Vaseur, në prag të rikthimit në pistë të makinave për garën e Baku, pas një pushimi të gjatë, ka konfirmuar se “kokëkuqja” do të ketë mjaft modifikime.
Deri më tani, “Ferrari” ka zhgënjyer totalisht, duke mos u ngjitur dot në podium në asnjë garë. Kjo paraqitje e dobët e ka bërë të domosdoshme një ndryshim rrënjësor në makinë.
“Ne po i përmbahemi planit që kishim që në fillim të sezonit, por i kemi të domosdoshme disa modifikime, për të patur një makinë më të ekuilibruar.
Në Melburn u paraqitëm më mirë se në dy garat e para, ndaj do të vijojmë të punojmë në këtë drejtim”, tha Vaseur.
“Mendoj se për në garën e Baku do të kemi një fluks të madh modifikimesh dhe disa të tjera do të aplikohen më vonë.
Gjithsesi, duke nisur nga Majemi, Imola e kështu me radhë, në çdo garë do të kemi risi.
Ju garantoj se do të shihni një makinë më të mirë, më të shpejtë e më kompetitive”, tha në fund Vaseur.
