I pari i diplomacisë së vendit, Bujar Osmani është sulmuar kohës së fundit për qasjen e tij ndaj Bullgarisë. Ekstremi i djathtë në Maqedoninë e Veriut asesi të pajtohet me veprimet diplomatike dhe racionale të Ministrit Osmani. Opozita e udhëhequr nga VMRO-DPMNE, intelektual maqedonas si Vlladimir Millçin e opinionistë si Pekevski, nuk mund të pajtohen me faktin se në Maqedoninë e Veriut një shqiptar mund t’u prijë proceseve politike.
“I huaj”, “Nuk ka ndjenja”, “Pa emocione” e shumë përkufizime tjera për punën e kryediplomatit Osmani. Reagimeve iu është përgjigjur njohësi i çështjeve politike Seladin Xhezairi.
“Debati që po zhvillohet jo vetëm nëpër ‘dritaret’ sociale, me breshëri sulmesh kundër Osmanit, provon se më shumë shfaqet interes për përftime partiake sesa për interesat e vendit. Angazhimet kundër ndarjes së ofruar për punëve që dalin nga Traktati i Miqësisë me palën bullgare, për vënien e tij në jetë (të propozuar nga Ministri i Jashtëm), nuk mund të zhbëhen me idetë ‘gjeniale’ që kjo marrëveshje të ‘anullohet’, sikurse propozoi këto ditë një ish-diplomat e as me aludimet e shumta se nuk mundet një shqiptar të vendosë për ‘çështje me interes për kombin maqedonas’.
Kujtoj se kanë të drejtë ata nga jashtë të cilët punës së numrit një diplomacisë së Maqedonisë së Veriut, 43 vjeçarit, Bujar Osmani, i japin notë shumë të mirë në raport edhe me homologët e tij nga pesë vendet e tjera ballkanike, kandidate për aderim në familjen evropiane.
Kritikët e tij, ndërkaq, me sulmet sipërfaqësore sikur e provojnë se janë zaif për nga dija, po pse jo, nga ana tjetër, se të njëjtët nuk kanë këllqe as për të ofruar rrugëzgjidhje, e as për të zhbërë punët e filluara. Si duket, ata(edhe më seriozët) mjaftohen që nesër të shfaqësohen në stilin ‘ nuk është se nuk e thamë, por nuk ka dëgjuan’! Për një forcë serioze dhe individë ‘ambiciozë’, kjo lë shumë për të dëshiruar…”, shkruan Xhezairi.
