Shkup, 8 shkurt – Nëpërmjet një komunikate LSDM ka reaguar ndaj deklaratës së Mickoskit për pagën minimale duke thënë se në kohën kur partia e tij qeveriste, punëtorët kishin page minimale prej 8.900 denarë.
“VMRO-DPMNE është partia e cila është kundër punëtorëve. Gruevski dhe Mickoski e promovonin vendin tonë si parajsë për fuqinë e lirë punëtore dhe sot Mickoski pa turp thotë se mbështesin pagën minimale”, thonë nga LSDM.
Nga LSDM shtuan se ekonomistët e Mickoskit publikisht kundërshtojnë rritjen e pagës minimale dhe se Trajko Sllaveski dhe Danella Arsovska janë gjithashtu në frontin kundër rritjes së pagës minimale.
“Po ashtu VMRO-DPMNE gjatë 4 viteve ka bllokuar të gjitha ligjet që ishin në interes të rritjes së të hyrave për qytetarët. E bllokoi rritjen e pagave të mjekëve dhe mbështetjen financiare në kohë krize. LSDM e rriti pagën minimale dhe vetëm për 4 vjet e gjysmë kemi dyfish rritje të pagës minimale”, theksojnë nga LSDM.