Hajriz Junuzi
14 shkurt – Një letër prekëse ka arritur në redaksin e Open-TV nga Hajriz Junuzi vëllai i Bekim Junuzit, ish ushtar i UÇK-së, i cili ndërroi jetë para ka ditësh.
Në këtë letër emocionuese vëllai Hajrizi përmes rreshtave të jashtëzakonshëm rrëfen se sa i thjeshtë ishte vëllai i tij, “Beka”.
“Si i ri ka qenë fëmijë i urtë, punëtor dhe shumë i thjeshtë. Ashtu sic ishte i urtë dhe i thjeshtë pa u ankuar kurrë në jetë dhe i kënaqur me atë cka kishte ashtu me thjeshtësinë e tij, pa bërë zhurmë shkoi në amshim. Do të më mungojë shumë pasi që ishte lidhja e vetme e imja me Kumanovën. Bekimi do të mbetet dhe do të jetoj gjithmonë në zemrat tona. Krenohem me veprat e tij dhe krenohem që e pata vëlla”, shkruan mes tjerash Hajrizi, i cili jeton dhe vepron në Zvicër.
Bekim Junuzi, i pari majtas, gjatë kohës në UÇK
Ja postimi i plotë i letrës së tij:
Vdekjet e papritura janë gjithmonë më të renda, e tillë ishte edhe kjo e vëllait Bekimit, por përcaktimit të Zotit s’mundet askush t’i largohet.
Bekimi ka qenë fëmija i dytë në familjen tonë, por ka qenë një shtyllë e familjes. Lidhjet familjare i ka pasur në rendin e parë, ndoshta sepse ne ishim në kurbet, po e di që ka qenë shumë i lidhur me familjen.
Si i ri ka qenë fëmijë i urtë, punëtor dhe shumë i thjeshtë. Ashtu sic ishte i urtë dhe i thjeshtë pa u ankuar kurrë në jetë dhe i kënaqur me atë cka kishte ashtu me thjeshtësinë e tij, pa bërë zhurmë shkoi në amshim.
Edhe pse gjatë kohë kemi qenë fizikisht largë njëri-tjetrit neve gati cdo ditë jemi dëgjuar në telefon, sepse i tillë ka qenë ai.
Do të më mungojë shumë pasi që ishte lidhja e vetme e imja me Kumanovën dhe cdo gjë kalonte nëpërmjet tij.
Do të na mungojë shumë neve familjes, po e di se edhe shokëve dhe shoqërisë, sepse ka qenë njeri i lidhur me ta, e sidomos me shokët e idealit. Nata që kaloi ishte ndër më të vështirat në jetën time, por duhemi të pajtohemi me caktimin e Zotit e të shohim përpara dhe të vazhdojmë jetën. Bekimi do të mbetet dhe do të jetoj gjithmonë në zemrat tona.
Ka lënë një familje të shëndosh dhe na ka lënë shumë miq pas.
Krenohem me veprat e tij dhe krenohem që e pata vëlla./Open-TV/