Gazetare: Vjollca Aliti
“Në të gjitha xhamitë në faljet e xhumasë kemi bërë apel që të respektohen masat, por edhe kemi përcjellë mesazhet që besimtarët ta marrin seriozisht vaksinimin”, deklaroi Shaqir Fetahi, Kryetar i BFI-së.
“Në masazhet për festat e mëdha fetare kemi apeluar vazhdimisht që të respektohen masat, sepse është më mirë të parandalohet diçka sesa të shërohet”, tha z. Stefan, Kryepeshkopi i Kishës Ortodokse Maqedonase.
Ministri i Shëndetësisë Sali tha se apeli i klerikëve për qytetarët është shumë i rëndësishëm.
“Unë jam i nderuar që në prani të përfaqësisë religjioze të vendit tonë këtyre njerëzve që gëzojnë kaq shumë respekt e dashuri nga grigja e besimtarëve të tyre të japim mesazhin se mundësia e vetme më e mirë dhe e dëshmuar si e drejtë për tu mbrojtur nga virusi Kovid19 është pikërisht vaksinimi”, u shpreh Bekim Sali, Ministër i Shëndetësisë.
Sipas të dhënave të fundit të Institutit të Shëndetit Publik deri në fund të janarit me dy doza janë vaksinuar rreth 850.000 qytetarë apo 40,7% e popullatës së përgjithshme, numër ky i cili është larg arritjes së imunitetit kolektiv. Sipas këtyre të dhënave, në Maqedoninë e Veriut nga COVID-19 e kanë humbur jetën 8,470 persona dhe mbi 80 për qind e tyre kanë qenë të pa vaksinuar.
Muaj me radhë interesimi i qytetarëve për tu vaksinuar nuk shënon rritje, ndërsa kjo përqindje mbetet në vendnumëro. Pos apeleve, shteti për momentin nuk udhëheq fushata intensive për të nxitur qytetarët të vaksinohen. Ditë më parë ministri i Shëndetësisë deklaroi se nuk parasheh që vaksinimin ta bëj të detyrueshëm për asnjë kategori të qytetarëve./Alsat.mk
