11 shtator – Quhet Jetmir Mehdii i cili jeton dhe vepron në kantonin e Aargau-s në Zvicër. Ai me origjinë është nga Çellopeku i komunës së Bërvenicës (Tetovë). Mehdii është fans i madh i Shkëndijës së Tetovës, shkruan Open-TV.
Për të Shkëndija është gjë e rëndësishme në jetë. Të shtunën, ai i ka bërë mbi 200 km rrugë (vajtje-ardhje) vetëm për të ndjekur skuadrën e tij të zemrës, e cila kishte ardhur në Zvicër për të zhvilluar një miqësore me FC Wil, që garon në Ligën e dytë të këtij vendi.
“Jam shumë i lumtur që e ndoqa nga afër klubin tim të zemrës-Shkëndijën, ndërsa fitorja prej 3-1 më gëzoi edhe më shumë mua si tifozë”, e nis rrëfimin e tij për Open-TV, Jetmir Mehdii, i cili plotë 34 vjet jeton dhe vepron në Zvicër dhe vijon:
“Po më shkonte mendja se një ditë Shkëndija të vij në Zvicër, por përmes shortit në ndeshjet europiane. Kur kuptova se Shkëndija do të jetë mysafire në qytetin e Ëil-it u gëzova. E falënderoj xhaminë e këtij qyteti që e solli Shkëndijën, e cila është në zemrat e shumë mërgimtarëve këtu këtu. E shtuna ishte ditë festive. Unë shallin e klubit e kam pas, kurse portieri Zahov ma dhuroi fanellën e tij”.
“Asnjëherë nuk ka ndodhë që ekipi i FC Wil, që garon në Ligën e dytë të Zvicrës të tubojë në stadium 5.000 shikues. Për FC Wil-in ky është një rekord, sepse i tërë stadiumi ishte i mbushur”, tregon ai.
Në familjen e Mehdiit të gjithë janë tifozë me Shkëndijën.
“Po, edhe vajza Kanita dhe djali Aldini janë tifozë të Shkëndijës, e kemi në zemër. Ne nga Zvicra i ndjekim rezultatet e saj në Ligën e parë të Maqedonisë së Veriut. Gëzohemi që është në vend të parë dhe kam besim se aty do të jemi deri në fund të kampionatit”, e përfundon rrëfimin e tij për Open-TV, mërgimtari dhe tifozi i kuqezinjve nga Tetova, Jetmir Mehdii. (Open-TV)
