11 shkurt – Ndihmëstrajneri i Renovës, Bashkim Livoreka deklaroi për Open-TV se ekipin e tyre e pret ndeshje e vështirë kundër Bregallnicës, nesër (ora 14:00) në stadiumin e qytetit në Shtip.
“Nga ndeshja e nesërme presim të luftojmë deri në fund të lojës për rezultat pozitiv, për shkak se do të jetë një lojë e rëndë, pasi që e dimë se edhe Bregallnica ka bërë përforcimet e veta, duke filluar nga trajneri e deri te disa lojtar kualitativ”, u shpreh për Open-TV ndihmëstrajneri i Renovës, Bashkim Livoreka.
Në ndeshjen e parë të sezonit pranveror tetovarët do të jenë pa njërin nga mbrojtësit më të mirë në Ligën e parë të Maqedonisë në pjesën e parë të kampionatit, Medin Bajrami, i cili vuan kartonin e kuq nga sezoni vjeshtor.
“Jo s’jemi komplet për shkak se lojtari Medin Bajrami është me karton të kuq nga gjysmësezoni i kaluar që e mori në lojën e fundit, por besojmë se jemi të përgatitur maksimalisht, si fizikish poashtu edhe psikikisht. Jemi të përgatitur në të gjithë aspektet”, tha Bashkim Livoreka për Open-TV.
Kujtojmë se në ndeshjen e parë në Tetovë, Renova pati shënuar fitore bindëse me rezultat 5-2. /Open-TV/
