Dashmir Elezi është rikthyer në Tetovë dhe do ta vesh sërish fanellën e Shkëndijës. Një muaj më parë ai vendosi për sfidën e tij të parë ndërkombëtare dhe nënshkroi për Torpedo nga Gjeorgjia, por për shkak të dy tragjedive familjare iu desh të kthehej në vendlindje.
Ky informacion është konfirmuar nga klubi tetovar. 18-vjeçari Elezi humbi babanë dhe gjyshin brenda një muaji dhe Torpedo i lejoi që të rikthehej në radhët e Shkëndijës.
Komunikata e KF Shkëndija:
KF Shkëndija përmes kësaj komunikate i drejtohet opinionit për të sqaruar situatën e re të krijuar në lidhje me sulmuesin Dashmir Elezi.
Edhe pse me kërkesë të vetë futbollistit dhe familjes së tij, KF Shkëndija vendosi të mos pengojë dëshirën dhe pretendimet e lojtarit për tu transferuar jashta vendit. Kësisoj u pranua oferta e Torpedo Kutaisit dhe Elezit i’u aprovua transferimi në Gjeorgji.
Fatkeqësisht pas firmosjes dhe prezantimit me klubin e ri, duke ditur ndodhitë familjare të Dashmir Elezit (brenda një muaj humbi babain dhe gjyshin), 18-të vjeçari është gjetur në situatë të rënduar emocionale dhe ndërkohë nga Torpedo Kutaisi i është dhënë leje që të kthehet në Tetovë për të vendosur me qetësi për të ardhmen.
Vendimi i futbollistit dhe familjes është se duke ditur ndodhitë familjare në këtë moment, transferimi jashta vendit ishte hap i shpejtuar dhe se në këtë periudhë Dashmiri ka nevojë të qëndrojë pranë të afërmve të tij.
KF Shkëndija sërish manifeston mirëkuptim dhe hap derën për Dashmir Elezin, i cili bashkohet me ekipin dhe do të jetë pjesë e jona edhe në periudhën që pason.
